Senaat van de "Marotte Zitterd"

Eine korte sjets van dees vereiniging.....

In de tweede hèllef van de sestigger jaore in de veurigge eeuw òntsjòng de gedachte òm de vastelaovesvereiniging "de Marotte" te òngersjteune bie 't promoote en in sjtandj hawte van de Zittisje Vastelaovend bie ein aantal Zitterder oet de middesjtandj en luuj mit funksies bie euverheid en bedriefslaeve.

Ein en anger hau es reesultaat de oprigting van ein kommittee mit de naam: Senaat van de" Marotte Zitterd".

In 't wilkomswoord van ooze preezedent op de hoompaagina höb geer den opzat en bedoelinge van oos vereiniging kènne laeze en ouch de viezie veur de toekoms.

In de loup der jaore zeen dao aevel ei paar sjoon tradiesies bie gekòmme:

Jeeder jaor wurd aan de prins nao aafloup van zien regeijeringsjaor ei gesjildert portrèt aangebao.

en jeeder jaor bezuike veer ein van de Sitzungen bie de Grosze Kölner in Kölle.

't Aanbeije van de nuuje Marottesjtaaf en ei biebeheurend bedraag in geldj vónj plaatsj in 't kader van 't jubbilleijum 11 x11 jaor Marotte Zitterd en beteikende ein insiedenteele òngersjteuning.

Door 't jaor haer zeen daonaeve nog mee senaatsaktievieteite. Ouch daovan zulle veer uch via dees websait op de heugte haute.

Ein van de kernaktiviteite is ouch 't organiseiere en finanseiere van de prinse-resepsie gewoore. Dees resepsie vèntj plaatsj nao de insjtallaase van de nuuje prins. Ouch de waageboewesj in de optochhal waere neit vergaete en òntvange van de Senaat ein finansjeel biedraage.